قصيده قويه من اب الى بنته

يا ريوف ياعلّك بحالـي تروفيـن 000 لاقلّ شوفي وانحنت بـي عصايـه
يمين من نـزّل تبـارك وياسيـن 000 انت قمر عمري وكوكب فضايـه
أدراك بالخاطر واعاملـك بالليـن 000 وارجي عسى الله مايخيّب رجايـه
احب من حبك واعادي المعاديـن 000 وادعي لك الله بالستـر والهدايـه
فقدتك البارح وجريت صوتيـن 000 هذي وهي ليله وعنـد انسبايـه
كله غلا ياويلي اثر الغـلا شيـن 000 الله واسالـه لايبـيّـن غـلايـه
من حبها حبيت كـل الصغيريـن 000 صارت محبتهـم بقلبـي هوايـه
عودتك الممشى على شان تمشيـن 00 اشد بالثنتيـن واقصـر خطايـه
وليا بكيتي قمت اهلل وتصغيـن 000 واحيان اغني لـك واردد غنايـه
يضيق صدري لاسمعتـك تونيـن 000 واجر صوتي من خـلاي بخلايـه
وان جيت ابقفي عنك لدّيت بالعين 000 الدرب قدامـي واطالـع ورايـه
رد الوفا ياريوف ماابيـه ذالحيـن 000 ابيـه لـي دارت عليـه رحايـه
ابيه لا منه غـدا الليـل ليليـن 000 لا اشتدّت الايام واظلـم سمايـه
وابيه لامن صارت العشـر ثنتيـن 000 اليا اتركونـي عزوتـي واقربايـه
وابيـه لا عـزّوك فـيّ المعزيـن 000 تدعين رب البيت يغفـر خطايـه
اليا كتب ربـي افـراق المحبيـن 000 ثم ادفنونـي لابتـي واصدقايـه
توك صغيرة سنّ مانتيب تدريـن 000 والعالـم الله وش تكـون النهايـه
اما التفتي لي وزيـن علـى زيـن 000 والا رميتينـي بـدار الرعـايـه

تســــــــــــــــــــــــــلم أنامل سطرت هالقصيده الرائعه وتسلم يدين نقلتها تسممين فيونكتي على مواضيعك المشوقه دائماً..
اللهم ارزقنا بر والديناوو أطعمهم ثمار برنا يارب العالمين واحفظ لي والدي يارب العالمين